Արաբ առաջնորդի հակապատկերը
11:34 - 31.10.2011
Անգլիական Sunday Telegraph թերթին Սիրիայի նախագահ Բաշար ալ Ասադի հարցազրույց է տվել Դամասկոսի իր տանը: Սիրիայում 7 ամիս առաջ սկսված հակակառավարական ցույցերից հետո սա առաջին դեպքն է, երբ երկրի առաջին դեմքը որեւէ արեւմտյան լրատվամիջոցի հարցազրույց է տալիս:
Ուշագրավ է թերթի լրագրողի` հարցազրույցի կազմակերպման մանրամասները ներկայացնող հատվածը: «Երբ փորձում ես այցելել որեւէ արաբ առաջնորդի, ականատես ես լինում չափազանց շքել դղյակների, բազմաթիվ ծառայողների, անվերջանալի թվացող անվտանգության աշխատակիցների, ստիպված ես լինում բազմաթիվ ստուգումներ անցնել: Ընդամենը մի քանի րոպեանոց հարցազրույցի համար ժամերով սպասում ես թիկնապահներով լցված սպասասրահներում, եւ քո բոլոր հարցերն անպատասխան են մնում:
Սակայն Բաշար ալ Ասադն այս ամենի ճիշտ հակապատկերն է: Կինը, ով կազմակերպեց հարցազրույցը, ինձ իր մեքենայով հասցրեց նախագահի բնակարան: Ոչ մի անվտանգության աշխատակից չէր երեւում: Միջին մեծության մեկ հարկանի տուն էր: Պարզ, առօրյա հագուստով նախագահը մեզ դիմավորեց նախասրահում, իսկ հարցազրույցն անցկացրինք Ասադի ոչ մեծ աշխատասենյակում: Չնայած օրն ուրբաթ էր` Սիրիայում հակակառավարական ցույցի օր, սակայն այն մարդը, ում ցանկանում էին ոչնչացնել ցուցարարները, շատ հանգիստ էր»:
Լրագրողի զարմանքին ի պատասխան Ասադն ասել է. «Նորմալ կյանքով եմ ապրում, ինքս եմ վարում իմ մեքենան, հարեւաններ ունեմ, երեխաներիս ինքս եմ դպրոց հասցնում»:
Հարցազրույցի ընթացքում Ասադը չի թաքցրել, որ անցնող 7 ամիսների ընթացքում ինքն էլ է սխալներ թույլ տվել, սակայն նշել է, որ Սիրիան Թունիս, Եմեն կամ Լիբիա չի կարող դառնալ, քանի որ «թե' պատմությունն է տարբեր, թե' վարվող քաղաքականությունը»:
Reply With Quote